Rusiye ordusı iyulniñ 8-ne keçer gecesi 54 darbe dronı ve dört S-300/400 zenit raketasını uçurdı, dep haber ete Ukrayina Silâlı quvetleri Ava küçleriniñ komandanlığı.
Berilgen malümatqa köre, raketalar Rusiyeniñ Kursk vilâyetinden uçurıldı, Shahed uçucısızları ve taqlitleri – Rusiyeniñ Kursk ve Orel yönelişlerinden ve işğal etilgen Qırımnıñ Sarabuz köyünden.
«Saat 08:00-ge qadar ava mudafaası memleketniñ şimali ve cenübinde duşmannıñ 34 Shahed uçucısızını (diger uçucısızlarnı) yoq etti. 26-sı ateş ücüm vastalarınen tüşürildi, 8-i coyuldı/radioelektron küreş vastalarınen bastırıldı», – dep haber ete Ukrayina arbiyleri.
Komandanlıq beş yerde darbe dronlarınıñ tüşkenini qayd etti.
Rusiye arbiyleri çeşit silâ qullanıp, Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri dep tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
