İyülniñ 9-na keçer gecesi Rusiye quvetleri Ukrayinağa 741 ava ücüm vastasınen ücüm etti, dep haber ete Ukrayina Silâlı quvetleriniñ Ava küçleri.
Seslendirilgen malümatqa köre, Rusiye ordusı:
- 728 Shahed darbe uçucısızı ve çeşit taqlit uçucısızlarnen Rusiyeniñ beş yönelişinden ücüm etti;
- Yedi H-101/«İskander-K» qanatlı raketasınen Rusiyeniñ Saratov vilâyetindeki Engels rayonından ve Kursk vilâyetinden ücüm etti;
- Altı H-47M2 «Kinjal» aeroballistik raketasınen Rusiyeniñ Lipetsk vilâyetiniñ ava boşluğından.
Darbeniñ esas yönelişi Volın ve vilâyetniñ merkezi Lutsk oldı.
«İlk malümatqa köre, saat 08:30-ğa qadar ava mudafaası 718 ava ücüm vastasını zararsız alğa ketirdi, 303 danesi ateş vastalarınen tüşürildi, 415-i coyuldı», – dep haber ete Ukrayina Ava küçleri.
Aman-aman 300 «Şahed» ve yedi qanatlı raketa urıp tüşürildi, daa 400-den çoq dron coyuldı ya da radioelektron küreş vastalarınen bastırıldı.
Rusiyeniñ ava ücüm vastaları dört yerde ücüm etti, urulğanlar 14 yerde tüşti, dep qoşa Ukrayina arbiyleri.
Rusiye arbiyleri çeşit silâ qullanıp, Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri dep tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
