Rusiye mahkemesi tarafından mahküm etilgen «qırımlı musulmanlar davasınıñ» mabüsi Arsen Abhairov Rusiyedeki Çuvaş cumhuriyetiniñ Tsivilsk şeerindeki №9 tüzetüv koloniyasına etap etildi. Bu aqta «Qırım birdemligi» cemaat birleşmesine ömür arqadaşı Azize Abhairova bildirdi.
Aqayınıñ aytqanına köre, Abhairov Çuvaş cumhuriyetiniñ Novoçeboksarsk şeerindeki İK-3-ten sert rejimli koloniya olğanı içün başqa yerge alğanlar. Novoçeboksarskta qırımlı dört ay qaldı.
Azize oña aş ve urba yollamağa istegende başqa yerge alınğanını bildi.
«Bir şey yollayjaq edik, amma aqayıma koloniya deñişti, dep aytqanlar», – dedi Azize Abhairova.
2019 senesi kiçik ayda Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
2020 senesi boş aynıñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.