Rusiye İç işler nazirligi 2014 senesinden başlap Rusiye Federatsiyası taqip etken qırımlılarnı qorçalağan advokat Nikolay Polozovnı qıdıruvğa ilân etti. Bu aqta Qırımtatar resurs merkezi haber ete.
«Meni bıltır dekabr ayında çetel agentleri cedveline kirsetken soñ bu ikâyeniñ tabiiy ve mantıqlı devamı cinaiy dava olacağını añladım. E, Rusiye akimiyeti şimdilik formal bir şeyge riayet ete: memuriy davalar aça ve adım-adım ketkenini köstermege tırışa. Amma maqsat, ebet, taqip ola», – dep tarif etti advokat.
Al-azırda Nikolay Polozov Rusiyede degil ve anda bir advokat faaliyeti yoq. Lâkin taqımı Rusiyede çalışmağa devam ete – hususan «Poisk.Plen» gumanitar teşebbüsi tahminen 1000 ukrayinalınıñ esirlikte olğanını tasdıqlap, qanunsız tutuv yerleri olğanını qayd etti.
Polozovnıñ aytqanına köre, şimdilik madde aqqında haber etilmedi, amma, kütleviy haber vastalarınıñ malümatına köre, laf Rusiye ordusını «itibardan tüşürüv» aqqında kete.
2024 senesi dekabr ayında Rusiye Adliye nazirligi Nikolay Polozovnı «çetel agentleri» cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.