İşğal etilgen Qırımda Rusiye arbiy komissarlıqları askerler ve rezervistlerni Rusiye Mudafaa nazirliginen añlaşmalar imzalamağa inandırmaq içün ştattaki ruhiyatçılarnı qullana. Bu aqta Qırım.Aqiqatqa adını bildirmegen yerli aq qoruyıcı bildirdi.
Onıñ malümatına köre, ruhiyatçılar, mahsus bilgilerine ve beceriklerine esaslanıp, yedek askerlerini "SVO" zonasında hızmet etmek içün añlaşma tizmege inandırmalılar.
“Qırımd arbiy komissarlıqlarındaki menbalarımnıñ malümatına köre, olarnıñ ştat ruhiyatçılarına Qırım sakinlerini Ukrayinanen cenkke çağıruv ve yedek askerleriniñ bazasını qullanıp, işke celp etmek vazifesi berildi. Bu vazifeniñ muvafaqiyetli becerilmesi vaziyette olarğa para mukâfatı berile. Ruhiyatçılar insan içün kerekli motivatsiyanı eñ yahşı saylay bileler, amma umumiy sözler de bar — Qırımdaki top-idareciler seviyesinde aylıq ve cenk tezden bitecek, status ve imtiyazlar ise ömür boyu qalacaq”, — dep ayttı aq qorçalayıcı.
O, şunı da qayd etti ki, Qırımnıñ Rusiye akimiyetine RF Mudafaa nazirligi tarafından qoyulğan planlarnı yerine ketirmek kettikçe qıyın.
“Kreml seferberlikniñ ekinci dalğasından şimdilik saqına, bunıñ içün bütün RF subyektleri, şu cümleden işğal etilgen Qırım ögünde yañı kontrakt askerlerini er türlü usullarnen celp etmek planını yerine ketirmek vazifesi qoyulğan. Plan bölge sakinleriniñ sayısına bağlıdır. Amma Qırımda yüzde 13-i qırımtatar ealisidir, qırımtatarlar ise añlaşmalar amam-aman tizmeyler. Bundan ğayrı, Qırımda pensionerlerniñ sayısı pek büyük. Böylece arbiy komissarlıqlar planlarını yerine ketirmek içün ruhiyatçılarnı celp etmek mecburlar”, — dep qayd etti aq qoruyıcı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.