Rusiye Federatsiyasınıñ Devlet duması FSBge öz tahqiqat izolâtorına (SİZO) saip olmağa aqqını qaytarğan qanunnı üçünci, soñki oquvda qabul etti. Vesiqa Devlet dumasınıñ malümat bazasında derc etildi, işke tüşürilmesi içün Federatsiya Şurası oña qoltutmalı ve prezident imzalamalı.
FSB izolâtorlarına devlet telükesizligine qarşı cinayetlerde qabaatlanğanlar alınacaq. Qanun leyhasınıñ müelliflerinden biri, deputat Vasiliy Piskarev aytqanına köre, bu adım «böyle cinaiy dava tahqiqatlarınıñ semereligini arttırmağa ve casuslarnı ve terroristlerni diger cinayetler boyunca qanunsız bağlarda sıñırlamağa» imkân berecek.
FSB – Rusiyeniñ büyük mahsus hızmeti, onıñ vazifesi devlet telükesizligini temin etmek ve terrorizm ve ekstremizmnen küreşmek ola – 2006 senesine qadar öz izolâtorları bar edi. Rusiyeniñ Avropa Şurasına kirgende yerine ketirmege kerek olğan şartlar çerçivesinde SİZOlar Adliye nazirliginiñ kontroline keçti. Lâkin, «Mediazona» qayd etkenine köre, FSB kene de Moskvadaki «Lefortovo» tahqiqat izolâtorını kontrol etmege devam etti, çünki anda mahsus hızmet baqqan davalarda qabaatlanğanlar tutula. 2024 senesi «Memorial» aq qorçalayıcı merkezi Rusiyeniñ Ukrayinağa qarşı büyük istilâsı başlağanından berli Taganrogdaki SİZO-2 de FSB kontroli altında buluna, çünki anda esir tüşken Ukrayina vatandaşları tutula. Çoqusı işkence körgenini şikâyet etken edi.
2022 senesi Rusiye Ukrayinağa qarşı büyük istilâ başlatqan soñ Rusiye Avropa Şurasından (Rusiye akimiyeti Rusiye bu teşkilâtnı özü terk etti, dep bildire) çıqarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.