Ukrayina Silâlı quvetleriniñ Baş ştabı bildire ki, oraq ayınıñ 7-ne keçken gecesi Pilotsız sistemalar quvetleriniñ bölükleri Mudafaa quvetleriniñ diger komponentlerinen işbirlikte Rusiye Federatsiyasınıñ Moskva vilâyetindeki "Krasnozavodskoy” himiyeviy zavodı"na ateş açtılar.
Ştabnıñ malümatına köre, işhanede pirotehnik vastalar ve silâlar, şu cümleden Şahed tipindeki dronlar içün termobarik silâ parçaları istisal etile.
Krasnozavodsk şeeri civarında bir sıra patlavlar qayd etildi ve yanğın tehnikasınıñ qomşu meskün yerlerde areket etüvi qayd etildi, yanğınnıñ aqibetleri tam olaraq daa belli degil, dep qayd eteler Ukrayina Silâlı quvetleriniñ Baş ştabında.
Bundan evel zavodğa ücüm aqqında Ukrayina dezinformatsiyağa qarşılıq Merkeziniñ yolbaşçısı Andriy Kovalenko bildirgen edi.
Rusiye telegram kanalları, Rusiye Federatsiyasınıñ Moskva vilâyetinde oraq ayınıñ 7-nde saba patlavlar eşitildi, dep bildirgen edi.
Rusiye Mudafaa nazirligi, gece devamında ava mudafaası küçleri Rusiye territoriyasında 91 ukrayin uçucısız uçağını urıp tüşürdi, olardan sekizi Moskva vilâyetinde, dep bildirdi. Rusiye ükümeti ücümniñ aqibetleri aqqında haber etmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.