Ukrayinanıñ Türkiye Cumhuriyeti Fevqulâde ve Vekâletli elçisi Nariman Celâl Ankaradaki Prezident sarayında Türkiye prezidenti Recep Tayyip Erdoğanğa işanç mektübini berdi. Bu aqta diplomat X içtimaiy ağında bildirdi.
«Bugün Türkiye Cumhuriyeti prezidenti Recep Tayyip Erdoğanğa işanç mektüplerini bermekten şeref duydım. Böylece Ukrayinanıñ Türkiye Fevqulâde ve Vekâletli elçisi olaraq faaliyet köstermek içün bütün vekâletlerimni resmiy şekilde aldım. Sıcaq qabul ve aytılğan qoltutuv içün minnetdarım. Eminim, Türkiye dostlarımıznen beraber Ukrayina ve Türkiye Cumhuriyeti arasında halqlarımıznıñ barışığı ve amanlığı içün strategik işbirligimizni inkişaf etip pekitecekmiz», – dep yazdı Celâl.
İşanç mektüpleriniñ prezidentke berilmesi – resmiy bir diplomatik adım, yañı tayinlengen elçiniñ bulunğan devlette missiyasını resmiy şekilde başlağanını köstere.
Türkiye Cumhuriyeti Cumhurbaşkanlığınıñ resmiy Facebook saifesinde de diplomatik vaqiağa bağışlanğan haber peyda oldı.
Celâlnıñ Ukrayinanıñ Türkiye elçisi olacağını Zelenskıy ilk sefer 2024 senesi dekabrniñ 20-nde bildirdi. Devlet yolbaşçısı 2025 senesi mayıs ayında bunıñnen bağlı buyruğını imzaladı.
Nariman Celâl Qırımtatar Milliy Meclis reisiniñ birinci muavini ola. 2014 senesi Rusiye işğalinden soñ Qırımda qalğan Meclis vekillerinden biridir. 2021 senesi sentâbr ayında Rusiye FSB hadimleri tarafından apiske alınıp, diversiya yapqanında qabaatlandı ve 17 yılğa üküm etildi. Daa doquz vatandaş reinesinen beraber Celâl 2024 senesi iyün ayında Rusiye apsinden azat etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.